Ok in düt Johr is de Platt-AG wedder in‘t Ohnsorg-Theater föhrt. De söben Kinners, de to de Platt-AG höört, hett an‘n 16. April nich to School gahn mösst. Se hett sik mit Fru Perschel, de Lehrersch von de Platt-AG, un mit Fru Soetbeer all freuh drapen un se sünd denn mit Bus un Bahn na Hamborg föhrt. In dat Studio von‘t Ohnsorg-Theater speel een Schauspeler ganz allen fief Rullen. He weer mal de Reisende Gulliver, denn wedder de Kaiser von Liliput un ok ‘n poor annere so dat he düchtig in‘t Sweeten keem. Wenn he een von de Liliputaners speel, denn schalt he üm up Platt, dat weer nämlich de ehr Spraak. In dat Ohnsorg-Studio passt man blot so bi föfftig Tokiekers un de Bühn is ganz dicht vör jem un all köönt goot seihn. Groten Indruck hett dat makt, as de „Minschenbarg‟ Gulliver bi‘t Löschen holp as den Kaiser sien Palast brenn. He hett dat nämlich so dahn, as dat ok Jungs makt. Water hett he nich halen mösst daför. As he denn bi den Kaiser in Ungnaad fullen is, is he leeber ut Liliput afhaut. Betahlt hett de Utfohrt wedder de Erwachsenen-Computer-Kurs, de in de Wendisch Everner Grundschool löppt.